Улаанбаатар хотын өсөн нэмэгдэж буй хүн ам, авто тээврийн хэрэгслийн тоо, төвлөрсөн бүтэц нь замын ачаалал, түгжрэлийг хотын хөгжлийн хамгийн том сорилтуудын нэг болгож байна. Энэхүү нөхцөлд их багтаамжийн, хурдтай, найдвартай нийтийн тээврийн систем болох метро нь зөвхөн тээврийн асуудлыг шийдвэрлэхээс гадна хотын эдийн засаг, орон зайн төлөвлөлт, дэд бүтцийн үр ашигт цогц өөрчлөлт авчрах стратегийн ач холбогдолтой юм.

Хотын хөдөлгөөний ачаалал, түгжрэл:

Төсөл хэрэгжсэнээр авто замын сүлжээний хөдөлгөөний эрчим ойролцоогоор 10%-иар сайжирч, тээврийн хэрэгслийн дундаж хурд 18%-иар нэмэгдэнэ. Энэ нь зөвхөн зорчих хугацааг богиносгоод зогсохгүй, шатахуун зарцуулалт болон тээврийн хэрэгслийн ашиглалтын зардлыг бууруулж, хотын эдийн засгийн үр ашгийг нэмэгдүүлэх чухал нөлөө юм.

Хот байгуулалтын үр нөлөө:

Метроны өртөө орчмын нийт 1,318 га нутаг дэвсгэрийг худалдаа, үйлчилгээний чиглэлээр дахин төлөвлөн хөгжүүлэх боломж бүрдэж, хотын эдийн засаг шинэ түвшинд хүрэх нөхцөл бүрдэнэ. Энэхүү хөгжүүлэлт нь “20 минутын хот” концепцод нийцсэн 14 хотын 6 дэд төвийг бэхжүүлэх гол хөшүүрэг болох юм. Түүнчлэн өртөө бүрийг түшиглэсэн Тээвэрт суурилсан хөгжүүлэлт (TOD)-ийн дэд төслүүд үе шаттай хэрэгжиж, 2031 оноос эхлэн жил бүр дунджаар 71.99 сая ам.долларын эдийн засгийн эргэлт бий болгох хүлээлттэй байна.

Мөн төсөл нь Улаанбаатар хотын 2040 он хүртэлх хөгжлийн ерөнхий төлөвлөгөө (“Улаанбаатар–2040”) болон холбогдох бодлогын баримт бичгүүдэд туссан зорилтуудыг хэрэгжүүлэхэд бодит дэмжлэг үзүүлж, хотын орон зайн зохион байгуулалт, өнгө төрхийг шинэ шатанд гаргана.

Дэд бүтэц, нийтийн тээврийн шинэчлэл:

Метро ашиглалтад орсноор нийтийн тээврийн хурд, найдвартай байдал мэдэгдэхүйц сайжирч, хотын хөндлөн чиглэлийн замын ачаалал газар доорх тээвэрт шилжинэ. Үүний үр дүнд авто замын сүлжээний ашиглалтын хугацаа уртасч, засвар үйлчилгээний давтамж буурах зэрэг эдийн засгийн үр ашиг бий болно.

Түүнчлэн метроны шугам нь бусад нийтийн тээврийн төслүүдтэй уялдсан байдлаар төлөвлөгдсөн нь хотын тээврийн нэгдсэн, уялдаа холбоотой системийг бүрдүүлэхэд чухал түлхэц болж, иргэдэд илүү хүртээмжтэй, үр ашигтай, тогтвортой хөдөлгөөнт орчныг бий болгоно.